L'amor equivocáu o mal amor, pero amor a lo último; la pérdida y el mieu a la verdá . Estos son les temes que podemos atopar nel nuevu llibru de José Angel Gayol, "Les derrotes cotidianes" (Trabe ), compuestu por 29 poemes que sirven como axuste de cuentes cola vida. L'autor va tar na llibrería el próximu martes, 10 de payares, a les 19:00h, pa falanos d'esti poemariu, acompañáu por Gonzalo G. Barreñada. Entrada llibre y gratuita . ¡Esperámosvos!
- "Les derrotes cotidianes" (Trabe): ye un axuste de cuentes cola vida d’un yo na edá adulta y madura. Dividíu en tres partes ensin títulu pero con cites (d’Auden, Elizabeth Bishop y Héctor Pérez Iglesias) que cumplen la función d’informar a quien llee sobre lo que va atopar: l’amor equivocáu o mal amor, pero, a lo último, amor; la pérdida (de la inocencia, pero sobre too d’una mocedá tuerba y sensual) y el mieu a la verdá (del pasu del tiempu, de les derrotes de la vida, de la muerte). 29 son los poemes que conformen esta obra, que, como toles de José Ángel Gayol, bancien p’hacia lo conceptual, concisu y «ensayísticu».
- José Ángel Gayol (Mieres, 1977): ye novelista y creador de testos teatrales pero, sobre manera, ye ensayista y críticu de fondura (Vértigu, 2016; Exercicios d’asturianu, 2016 y El silenciu invisible, 2020), cuentista (Los cuerpos celestes, 2021) y diarista (En primera persona, 2019; y Les mudances del tiempu, 2022). Pero tamién ye poeta (Los poemes del oriental, 2013; El llibru de les coses misterioses, 2013; Los suaños y los díes, 2014; Una selmana y otros díes, 2015; toos cuatro publicaos por Ediciones Trabe), una faceta menos conocida d’ente tola obra d’él.
- Gonzalo G. Barreñada (Sotrondio, 1973): llicenciáu en Xeografía y Historia, ye poeta y novelista. Col so poemariu «El llar n’orde» foi a ganar el Premiu Xuan María Acebal del añu 2020. Nel 2023 lleva tamién el Teodoro Cuesta de Poesía por «Cartes al treslluz». Ganador del premiu Xosefa Xovellanos de Novela en 2022 con «El viaxe del cacique», ye tamién el creador del universu lliterariu de Burgundu, marcu xeográficu nel qu’asitia obres como «La casa de Xuan Buelga», «Hestories de Burgundu» o «La hestoria ensin contar», asina como «La Guerra del Medrosu», novela d’aprendizaxe, histórica al empar que fantástica cola que l’autor llevó’l «Andrés Solar Santurio» de Novela Curtia.
