Un cadabre apaez en plenes obres del nuevu claustru del monesteriu de San Pelayu'l Real d'Uviéu. Ismael González Arias viaxa hasta xunu de 1664 nel so nuevu llibru, "Marcaes pol estigma (1664/1665)" (Ediciones Trabe), col que ganó'l Premiu "Xosefa Xovellanos" de Novela 2024, y que va presentar na llibrería'l próximu xueves, 16 d'ochobre, a les 19:00h. Va Tar acompañáu pol poeta Gonzalo Llamedo. Entrada llibre y gratuita. ¡Esperámosvos!
- "Marcaes pol estigma (1664/1665)" (Ediciones Trabe): El 22 de xunu de 1664, nos primeros trabayos de les obres del nuevu claustru del monesteriu de San Pelayu’l Real d’Uviéu, los canteros trasmeranos topen con un cadabre. Nun hai conocimientu de qu’ellí enxamás hubiera un cementeriu. Da la sensación de que lleva bien d’años enterráu, pero’l cuerpu permanez incorruptu. ¿Qué va poder dicir de too ello la madre abadesa, sor María de l’Asunción? ¿Qué cuenten nesta hestoria los miembros de la secta de los dexaos del Monsagru? ¿Qué tendrá qu’añadir a too ello’l señor obispu d’Uviéu, Ambrosio Espínola de Guzmán, acabante aportar a la diócesis? La investigación pela parte del monesteriu encárgase a sor Hildegarda de la Bona Madre, otrora pelaya y agora monxa xiróvaga. La propia de la Ilesia, a Bernardo Arboleya Santarrúa, calificador del Santu Oficiu, doctor en Teoloxía y maestru n’Artes. El tiempu cuerre escontra d’ellos. El díxome díxome de la xente marmulla que se trata d’una santa. Sor Hildegarda sabe que non. Pero ella tien más hestories qu’esconder.
- Ismael González Arias (Uviéu, 1958): xestor cultural y productor musical, ye fabulador de vocación y narrador que bebe nes formes y na soltura de les fontes de la oralidá. Como narrador ganó tres veces el Premiu de Novela «Xosefa Xovellanos» con El cuartu negociu (1992), En busca de Xovellanos (2005) y nel 2024 con esta obra qu’agora se publica, Marcaes pol estigma (1664-1665). Tamién cola novela xuvenil Les puertes del paraísu foi a facese col Premiu de Lliteratura Infantil-Xuvenil «María Josefa Canellada» 2009. Autor d’otres noveles (La boda del añu, 2003; El tiempu de Manolo, 2005; La reserva protexida de Les Cuenques, 2021...), en Faciendo tiempu n’Ítaca recoyó 16 cuentos, unos esperdigaos per revistes y otros inéditos. Articulista de mirada aliella y palabra aguda, en Folganza (2018) reunió delles columnes escrites ente’l 1997 y el 2001.
- Gonzalo Llamedo (Nava, 1990): ye Profesor de Filoloxía Románica na Universidá d’Uviéu y Vocal de l’Asociación d’Escritores d’Asturies. Dende’l 2021, colabora col Gobiernu del Principáu d’Asturies como xuráu nos premios lliterarios que convoca la Conseyería de Cultura, Política Llingüística y Deporte. Tamién tien colaboraciones como autor nes revistes Lliteratura (númberos 36 a 40) y Formientu (númberos 18 a 20), nes estayes de Poesía, Narrativa, Ensayu y Crítica lliteraria. Como escritor en llingua asturiana, nel 2022 ganó’l El XXVIII Premiu de Poesía Fernán Coronas, col poemariu Los fíos de Bauman. Nel 2019 ganó’l II Concursu de Microrrellatos Luisa Rebollar del Ayuntamientu de Sariegu y quedó finalista nel VI Concursu de Microrrellatos La Voz del Barrio de la Biblioteca Popular Santiago de Xixón. Nel 2020, ganó’l I Concursu #AndanciuLliterariu d’Iniciativa pol Asturianu y el V Concursu de Microrrellatos Entaína a escribir, entamáu pol Gobiernu del Principáu d’Asturies y l’Institutu Asturianu de la Mocedá, quedando tamién finalista con un relatu n’asturianu nel Concurso de relatos breves BUO de la Universidá d’Uviéu. Nel 2021, llevó’l tercer premiu del VI Concursu de Microrrellatos Entaína a escribir.
