Hebo una dómina na que'l mundu taba entá por descubrir. Una dómina d'islles perdíes, tierres por esplorar, ciudaes por descubrir, tribus por conocer, ayalgues por arramplar con elles y maraviyes énte les que quedar plasmáu. Hebo un tiempu en que les tripulaciones de los barcos mercantes descubríen les coses más maraviyoses y llamaderes. Los Viaxes de Gulliver ye, quiciabes, el meyor llibru d'aquella dómina. Un clásicu de la lliteratura universal y precursor de la fantástica que podemos lleer güei n'asturianu gracies a la mano de Víctor Suárez.
Nesta edición, de les poques que contienen les cuatro partes nes qu'orixinalmente ta escrita la novela de Swift; vamos a atopar a los pequeños homes de Liliput y a los xigantes que teníen a Gulliver na palma de la mano; sí. Pero tamién vamos atopar islles que vuelen pelos aires, países con xente inmortal, nigromantes que convoquen a les ánimes de los muertos del pasáu o caballos que falen.
