La Fantasía Asturiana vieno pa quedar y queda precisamente porque conecta cola que foi la nuesa tradición lliteraria popular. La de verdá, la oral. Aquella que falaba de cuélebres, de xanes, de nuberos y de guaxes. De too eso hai un poco equí, cachinos de les Lleendes d'Asturies y de la mente de los y les autores que participen nesta esbilla pa discurrir mundos inventaos y hestories de fantasía.
Si l'añu pasáu llanzamos l'Horru de Vapor, pa facer homenaxe a esi pasáu industrial asturianu y face-y xusticia a la falta de ciencia ficción victoriana, agora sacamos esti Horru Máxicu qu'entronca cola nuesa propia tradición máxica más auténtica, celta, sí, pero sobre too atlántica.
Nestes páxines vais ver güercos, horros, monstruos, coses ensin esplicación, narraciones épiques y munches coses más. Toes elles ilustraes pol propagandista "oficial" d'Ediciones Radagast dende Depués d'Ochobre, Xon de la Campa.
