El Diccionariu Etimolóxicu de la Llingua Asturiana (DELLA) surde gracies a los materiales recoyíos del nuesu léxicu patrimonial según les pautes yá conocíes y asoleyaes nel Diccionario General de la Lengua Asturiana (DGLA). Quiximos, de magar entamamos la recoyida nos años ochenta del pasáu sieglu, que l'inventariu que daquella llográbamos, siempre curtiu, fora un finxu bien llantáu onde dir encontando l'estudiu etiolóxicu del dominio llingüísticu ástur. El DELLA reproduz los datos del DGLA pero con delles novedaes dignes de considerenaza. La primera iguando les deficiencies alvertíes, amestando dalgunos elementos nuevos y ufiertando más entraes cuando l'estudiu etimolóxicu asina lo aconseyaba. La segunda novedá del DELLA ye que conseña les informaciones semántiques mayoritariamente n'asturianu, lo mesmo que la discusión científica, por abultanos que'asina fadráse ver el desendolque y grau d'operatividá del nuesu idioma dando cuenta de sí mesmu. Con too, fuimos a la gueta d'una llinia d'espresión non enguedeyada y naguando por perpasar los pilancos que torguen el bon entendimiento d'un llector curtiamente avezáu a la llectura nesti idioma pero con conocencia acondada de dalguna llingües hispániques.
